當AI遇上八十幾歲老爸的尋親夢
第一章：一張二十年前的地址，一個過期理工男的噩夢
話說某天，我八十幾歲的老爸大人突然拿出一張泛黃的紙條，上面寫着一個二十幾年前的地址，眼神誠懇地對我說：「仔啊，幫我寫封信，搵下你表叔。」
我，一個自稱「過期理工男」的中年人，面對這個任務，內心只有三個字：玩嘢咩。
二十幾年前的地址？即係咩概念？即係嗰度可能已經重建咗三次，住嗰個人可能已經搬咗五次，而家嗰度可能係一間 Starbucks，或者更慘——變咗一個地盤。
但我還是乖乖打開 Google Map，用街景功能睇下嗰個地址。
「哦，原來係一間雜貨店。」
鏡頭一轉，而家係一間鋼鐵物資店。門口堆滿鋼筋同鐵板，完全唔似有人住。我心裡面已經打定輸數：「老爸，呢單嘢凍過水。」
但係，我唔可以就咁放棄。因為我老豆嘅眼神，係嗰種「我等咗二十年」嘅眼神。
第二章：當過期理工男遇上火熱AI
幫八十幾歲嘅老豆寫英文尋親信，難度系數有幾高？
我嘅英文水平，大概係只得翻「How are you? I'm fine, thank you」嘅水平，叫我睇英文文章冇問題，寫就是大問題。而且我都上咗年紀，腦筋轉數慢過以前。正當我對住張白紙發呆嘅時候，我突然諗起：係喎，而家咪有AI囉！
於是我打開咗 Gemini，打咗幾十個字嘅提示詞：
「幫我寫一封尋親信，英文，寄去一個二十年前嘅地址，收信人係一間店舖嘅店主，內容係想搵一個親戚，語氣要誠懇得嚟唔好太嚴肅，留低我嘅聯絡方法。」
幾秒之後。
螢光幕上出現咗一封英文尋親信。文法正確，語氣得體，仲有少少溫暖感。我睇完之後，成個人呆咗。
「AI原來已經咁勁？」
我當時嘅感覺，就好似一個一直以為自己識煮飯嘅人，突然食到米芝蓮三星，然後發現自己以前煮嘅係即食麵。
第三章：高端方式寫信，原始方式寄信
寫好封信之後，我面對另一個問題：點寄？
Email？我根本唔知對方嘅 email。WhatsApp？我連對方係咪仲喺度都唔知。
最後，我決定用一個最原始、最直接、最「唔科技」嘅方法：寄快遞。
無錯，我用咗2026年嘅AI寫信，然後用咗上世紀嘅方法寄信。呢個組合，就好似用 Tesla 載住一籮雞蛋去街市賣一樣，有種莫名其妙嘅違和感。
但係，我喺封信入面留咗兩個「科技聯繫方式」：
我嘅 email
我嘅回郵地址
然後，我就懷住「呢封信可能石沉大海」嘅心情，等。
第四章：等，然後奇蹟出現
一個星期後。
我收到一封 email。
係嗰間鋼鐵物資店嘅姐姐。佢話佢認識我父親。
吓？真係搵到？
我當時嘅反應，大概係一個中了六合彩但又唔敢相信自己中咗嘅人。我即刻同老豆講：「搵到喇！」
然後，我哋用email交換咗 Messenger。對，係 Messenger，一個而家後生仔可能覺得「老土」嘅即時通訊工具。但對於兩個相隔幾十年嘅家庭嚟講，呢個就係最新嘅橋樑。
第五章：科技，原來一直都在
最後，我父母真係踏上咗探親之旅。
如果冇 AI，我可能寫唔出嗰封信，或者寫著封質素唔多好尋親信。
如果冇 Google Map，我可能唔知嗰度變咗鋼鐵店。
如果冇 email 同 Messenger，我哋可能到而家都仲等緊。
科技嘅進步，唔係要你識寫 code，唔係要你買最新嘅手機，而係喺你最需要嘅時候，佢已經靜靜哋喺度，幫你做到一啲你以為冇可能嘅事。
後記：一個過期理工男的覺悟
我以前覺得 AI 係「未來嘅事」，係「後生仔嘅玩具」。但經過呢次尋親之旅，我明白咗：
AI 已經唔係未來，佢係而家。
佢唔係遙遠嘅科技，佢係你阿爸搵親戚嘅時候，嗰封幫你寫得靚靚嘅英文信。
佢唔係冷冰冰嘅程式，佢係幫你連接返幾十年親情嘅嗰條線。
科技改變咗我哋嘅生活方式，但同時，佢都保護咗人與人之間嘅聯繫。
而我，一個過期理工男，終於都追得上時代嘅步伐。
全靠 AI 幫我寫咗封信。（完）
Findtutorial.com 編輯部: Maker Papa｜香港家長教育筆記
Last Updated: 12-Oct-2026